Pila ka semana na lang ang nabilin antes ang US presidential elections, nagbisita si anay President kag subong Republican presidential candidate Donald Trump sa isa ka popular nga fast food chain sa Pennsylvania bilang kabahin sang iya kampanya.
Nakit-an si Trump nga yara sa drive-thru kag nagkapot man mismo sa fryer samtang nga nagasabat sang mga pamangkot sang reporters.
Bangud kadungan ini sa ika-60 nga kaadlawan sang iya kasumpong sa eleksyon nga si Vice President Kamala Harris, sarkastiko man sini nga ginpanginbulahan ang Democrat sa iya kaadlawan kag naglahog nga hatagan sang fries.
Ini nga campaign visit sa nasambit nga critical battleground state ang ginapahayag nga isa man ka tikang batok kay Harris bangud nakasugid anay ang vice president nga naka-trabaho siya sa isa sa branch sang amo nga fast-food chain.
Natabo ini sa Alameda, California sang summer sang 1983 sang estudyante pa lamang ini sa Howard University kag nakatrabaho ini sa register amo man sa french fry and ice cream machines.
Ginbali ini ni Trump kag nagsiling nga nagabinutig si Harris sa iya eksperyensya para lang nga mapadayaw sa publiko ang iya working-class credibility.
Sa pihak nga bahin, ginselebrar naman ni Harris ang iya birthday sa duha ka simbahan sa Georgia bilang paagi sa pagpakig-angot sa Black voters paagi sa religious communities.
Pareho subong nga ginatutukan sang duha ang battleground states samtang nagapamintana na ang eleksyon.
