ILOILO CITY – Nagpositibo sa COVID-19 si US First Lady Jill Biden kag nag-develop sang mga sintomas, duha ka semana matapos nga nagpositibo man sa ikaduha ka beses ang iya nga bana nga si US President Joe Biden.
Suno sa iya communications director nga si Elizabeth Alexander, ang 71 anyos nga asawa sang presidente ang nag-negatibo na sang Lunes apang naka-develop sang cold-like symptoms pagkagab-i.
Sa rapid antigent test, nag-negatibo ang first lady apang nagpositibo naman sa reverse transcription polymerase chain reaction (RT-PCR) test.
Nakabaton na sang oral antiviral pill nga Paxlovid si Jill kag maga-isolate sang at least lima ka adlaw.
Suno pa kay Alexander, fully vaccinated na ang first lady kag nakabaton na sang ikaduha nga booster shot kag naga-eksperyensya gid lamang sang mild symptoms.
Nagpositibo si Jill samtang nga nagabakasyon sa South Carolina kun sa diin, nagtinir ini sa isa ka private residence kag magabalik sa White House pagkatapos sang duha ka sunud-sunod nga negative tests.
Kung madumduman, si President Biden ang naka-recover na sa ikaduha nga beses nga pagpositibo sa COVID-19.
Una siya nga nagpositobo sang Hulyo 11 kag nag-isolate sa White House kag pagkatapos sang apat ka adlaw nga pag-negatibo sa mga tests, nagpositibo ini liwat sang Hulyo 30 kag nag-isolate sa ikaduha nga kahigayunan.
