Aprubado na sang United States ang pagbaligya sang masobra $7.4 billion nga balor sang bomba, missiles, kag iban pa nga kaangay nga mga equipment sa Israel.
Suno sa US Defense Security Cooperation Agency (DSCA), sa balor nga ini, $6.75 billion ang para sa bomba, guidance kits kag fuses, samtang $660 million naman sa Hellfire missiles.
Ginsiling sang US nga ang pagbaligya sini nga mga bomba amo ang magapauswag pa sang kapasidad sang Israel nga mabatuan ang mga pamahog sa ila pungsod subong kag sa palaabuton, mapabaskog pa ang ila depensa, kag preparasyon pa sa iban nga regional threats.
Ang missile naman suno sa Estados Unidos ang magabulig sa Israeli Air Force nga depensahan ang ila border, importante nga mga imprastraktura, kag ang sentro sang ila nga mga populasyon.
Bisan pa nga aprubado na sang State Department ang pagbaligya sini, kinahanglan pa nga makapasar ang transaksyon sa Kongreso apang ginapanan-aw nga indi man ini magpamalabag bangud ang Israel ang pinakasuod nga kaalyado sang US sa Middle East.
Matandaan nga naggamit man ang Israel sang American-made weapons sa ila giyera sa Gaza nga nag-umpisa sang Oktubre 2023 kag naunta subong lang nga tuig bangud sa phase 1 sang ceasefire.
