Ginmandu ni United States President Donald Trump ang pag-atake sa military sites sa sulod sang Venezuela.
Ginkumpirma man sang US officials ang strikes nga ginhimo.
Nabatian man ang serye sang pagsinigabong sa kapital sang Venezuela nga Caracas. Wala pa sang nagsulod nga mga impormasyon kun may yara sang nasamaran ukon napatay.
Kasunod sang pagpang-atake, nawad-an sang suplay sang kuryente ang palibot nga mga komunidad.
Sa isa ka official statement halin sa gobyerno sang Venezuela, ginkondena sini kag ginpamatukan ang military aggression sang US military.
Matandaan nga antes ini, may yara sang U.S. military buildup sa region kun sa diin lakip sa ginpadala sa Carribean amo ang USS Gerald R. Ford aircraft carrier kag iban pa nga mga warships.
Nahibaluan nga mataas ang tension sa tunga sang duha ka pungsod bangud sa isyu sang drug trafficking. Gin-akusaran sang Trump administration si Venezuelan President Nicolas Maduro sang pagpasulod sang drugs, kag pag-trabaho kaupod sa gangs nga mga terrorist organizations apang ginpanginwala naman ini ni Maduro.
