ILOILO CITY – Magapadulong sa Taiwan si US House of Representatives Speaker Nancy Pelosi sa Martes sang gab-i kag magpakigkita kay President Tsai Ing-wen sa masunod nga adlaw.
Nagpamalibad ang Taiwan Presidential Office and the Foreign Ministry nga maghatag sang komento.
Ang pagbisita sang US congressional leader ang pat-ud nga magaresulta sang tension nagikan sa China nga naga-angkon sang democratic self-ruled island sang Taiwan.
Nagsugod ang four-nation Asia tour ni Pelosi sa Singapore.
Ang tatlo ka iban nga pungsod nga kadtuan niya amo ang Malaysia, South Korea kag Japan.
Una na nga naka-schedule ang iya pagpadulong sa Taiwan sang Abril apang nakanselar ini matapos nga nagpositibo sa COVID-19.
Ang mga report nga nagapahayag nga magabisita si Pelosi sa Taiwan subong nga bulan ang nagtuga sang kaakig sa Beijing kag nagpamahog sang posible nga military countermeasures.
Sang Lunes, ginpahayag ni Chinese Foreign Ministry spokesman Zhao Lijian nga ang pagbisita ni Pelosi sa Taiwan ang mangin isa ka dako nga interference sa internal affairs sang China kag maga-apekto sa China-US relations kag maga-trigger sang tuman ka lain nga impact sa pulitika.
Ginpahayag sini nga ang Chinese military ang indi magpabaya kag ang Beijing ang magahimo sang mapag-on kag mabaskog nga mga tikang agud nga maproteksyunan ang soberanya sang ila pungsod apang wala ginpaathag kun ano ang specific nga mga tikang nga himuon.
Bilang balos sa posible nga pagbisita ni Pelosi sa Taiwan, nagpatigayon sang live-fire drills sa baybayon sa pihak sang self-ruled island ang China.
Una na nga ginpaandaman ni Chinese leader Xi Jinping si US President Joe Biden sa isa ka telephone call.
