ILOILO CITY – Apisar sang seryoso nga pamahog sang China, nagdayon gid si US house speaker Nancy Pelosi sa pagpadulong sa Taiwan.
Kagab-i, nag-abot sa Taiwan ang US Air Force Boeing C-40C kung sa diin sakay ang US house speaker.
Wala sang may ginpatigayon nga official ceremony kag ginsugata lamang siya sang foreign minister sang Taiwan.
Sang naka-landing na sa Taiwan, nag-post sang isa ka short statement si Pelosi nga nagapahayag nga ang iya pagbisita sa pungsod ang maya katuyu-an nga i-highlight ang commitment sang US sa pagsuporta sa demokrasya sang amo nga pungsod.
Ginpahayag niya nga ang iya pagbisita ang wala nagakontra sa “long-standing one-China policy”.
Natalana nga magpakigkita para sa isa ka lunch meeting si Pelosi kay Taiwan President Tsai Ing-wen subong nga adlaw.
Lakip man sa aktibidad ni Pelosi amo ang pagpakigkita sa grupo sang mga aktibista nga outspoken sa human rights record sang China.
Matandaan nga una na nga nagpa-andam si Chinese President Xi Jinping kay US President Joe Biden nga indi maghilabot sa isyu sa Taiwan agud nga malikawan ang posible tuman ka dako nga tension.
Matapos nga nag-landing ang ginasakyan ni Pelosi sa Taiwan, gilayon nga nagpatrolya ang China sang bombers, fighter jets kag surveilance aircraft malapit kag mismo sa air defense zone sang Taiwan.
Lakip na diri ang 21 ka Chinese military aircrafts.
Bangud sini, gin-conclude sang U.S. Defense Department nga ang Chinese army ang nagahanda para sa isa ka contingency agud nga ma-unify ang Taiwan sa People’s Republic of China pinaagi sa paggamit sang pwersa.
Nahibaluan nga ang Chinese military ang naka-high alert kag natalana nga maglunsyar sang “targeted military operations” bilang balus sa pagbisita ni Pelosi sa Taiwan.
Ang People’s Liberation Army’s Eastern Theatre Command ang nagpahayag nga magapatigayon sila sang joint military operations malapit sa Taiwan kag maga-test-launch sang conventional missiles sa sea east sang Taiwan.
Ang pagbisita ni Pelosi sa Taiwan ang gintawag sang foreign ministry sang China nga isa ka seriuos violation sang one-China principle kag may dako nga impact sa political foundation sang China-U.S. relations.
