Ginkondena nanday US President Donald Trump kag Japanese Prime Minister Shigeru Ishiba ang China sa mga aktibidad sini sa West Philippine Sea nga nagapang-garit-garit kag nagapasaka pa sang tensyon sa teritoryo.
Base ini sa joint statement nga ginpaguwa matapos nga nagkit-anay ang duha ka nasambit nga lider sa bilateral summit sa Washington D.C. sang Pebrero 7.
Suno pa sa amo nga statement, ginpabakod nanday Trump kag Ishiba ang ila nga seryoso nga pagpamatok sa iligal nga martime claims sang People’s Republic of China, ang ila nga militarisasyon sa gin-reclaim nga features, kag ang mga pagpamahog sa amo nga kadagatan.
Ginpasalig man sang duha nga pareho sila nga determinado nga mag-kooperar para sa hilway kag malinong nga Indo-Pacific region.
Paagi man sa ila nga kooperasyon, ginalauman ang dekalidad nga infrastructure investments sa rehiyon kaangay sang deployment sang Open Radio Access Networks sa third countries.
Una na nga nagpromisa ang US kag Japan sang USD8 million para sa Open Radio Access Network (RAN) field trials nga amo ang makapasigurado sang masaligan nga impormasyon kag communications technology ecosystem sa Pilipinas.
Subong nga bulan, natalana nga pormal nga magpirma ang Japan sang diplomatic notes para sa ila nga non-project grant aid para sa Open RAN System sa University of the Philippines.
Ang latest nga ginahimo sang China sa West Philippine Sea amo ang pag-deploy sang ila nga coast guard vessels lakip na ang monster ship 100 nautical miles halin sa coastline sang probinsya sang Zambales.
