Padayon pa nga gina-imbestigaran sang otoridad ang kaangtanan sang duha ka magkasunod nga insidente sa Estados Unidos sang Amerika kun sa diin isa ka Tesla Cybertruck ang nagsigabong sa Las Vegas, Nevada samtang isa naman ka truck ang nang-arado sang mga tawo sa New Orleans, Louisiana.
Suno kay US President Joe Biden, wala pa sang link ukon kaangtanan nga nakit-an subong.
Base naman sa Federal Bureau of Investigation (FBI) kag sa local law enforcement, posible nga isa ka isolated incident ang natabo sa Las Vegas apang wala man ginadula ang anggulo kun isa ini ka akto sang terorismo.
Natabo ang insidente sa guwa sang isa ka hotel nga ginapanag-iyahan ni president-elect Donald Trump.
Ang nagadala sang Tesla Cybertruck amo ang highly-decorated soldier kag active-duty US Army Green Beret nga si Matthew Alan Livelsberger.
Napatay man si Livelsberger sa amo nga insidente matapos sini gintiro ang iya kaugalingon sa sulod mismo sang salakyan.
Isa siya ka Army Special Forces operations master sergeant kag yara sa active duty sa Germany kaupod sa 10th Special Forces Group apang naka-leave sang natabo ang insidente.
Ang US Special Forces ukon ginatawag nga “Green Berets” amo ang elite fighting force nga bantog sa guerilla warfare kag unconventional tactics sa luwas sang pungsod.
Sang natabo ang insidente, gin-park anay ang electric vehicle sa guwa sa glass entrance sang Trump International Hotel antes ini nagsigabong kag napilasan man ang pito ka iban pa nga mga tawo.
Iban pa sa nakit-an sa sulod sang truck amo ang second firearm, fireworks, passport, military ID, credit cards, iPhone kag smartwatch.
PAGPANG-ATAKE SA NEW ORLEANS
Ginapatihan naman sang FBI nga 100% nga ginsunod sa Islamic State of Iraq and Syria (ISIS) ang pagpang-atake sa New Orleans kun sa diin gin-arado sang truck ang mga tawo nga nagaselebrar sang New Year.
Suno pa sa FBI, isahanon lamang ang 42-anyos nga suspek nga si Shamsud-Din Jabbar sang ginhimo sini ang krimen.
14 ka mga tawo ang patay sa amo nga lugar kag madamo ang pilason kag patay man ang suspek sang nagbato ini sa mga pulis.
Isa ka Army veteran ang suspek nga tumandok sang Texas kag may flag man sang ISIS sa iya salakyan.
Sa videos sini nga gin-post antes ang pagpang-atake, ginkumpirma sini nga nagsulod gid man siya sa amo nga terorista nga grupo.
Nagguwa nga Disyembre 30 pa sini gin-arkilahan ang Ford F-150 pickup truck sa Houston kag gindala ini sa New Orleans sang Disyembre 31 sang gab-i.
Sang kaagahon sang New Year’s Day, nangtanum pa si Jabbar sang improvised explosive devices sa intersection sang dalan sa Bourbon kag New Orleans kag iban pa nga lokasyon.
Sunod ini nga nagpang-post sang videos sa Facebook nagtuad nga iya kuntani pamilya kag mga abyan ang unahon niya patay. Naghatag man ini sang last will kag testament sa iya katapusan nga video antes sini ginhimo ang krimen.#
