Duha na ka mga tawo ang na-rekord nga patay kag madamo ang ginapahayag nga nasamaran bangud sa lapnagon nga wildfire sa Los Angeles, California, USA.
Magluwas diri, ginmandu man ang mandatory evacuations sang masobra sa 80,000 ka mga tawo sa area.
Sa inisyal nga impormasyon, ang Palisades Fire ang nakalamon na sang masobra sa 5,000 ka ektarya samtang ang Eaton Fire naman nakahalit na sang 2,200 ka ektarya.
Sa pihak nga bahin, naglab-ot na sa 500 ka ektarya ang naapektuhan sa Hurst Fire.
Nahibaluan nga ang Pacific Palisades ang nahamtang sa tunga-tunga sang Santa Monica Mountains kag Pacific Ocean.
Nag-umpisa ang Eaton Fire 6:30 p.m. sa Pasadena kag Altadena area, samtang nagsunod ang Hurst Fire sang 10:30 p.m. sa Sylmar, north sang San Fernando.
Natabo ang sunog bangud sa kumbinasyon sang dry conditions kag mabaskog nga hangin.
Lapaw naman sa 300,000 energy customers ang nautdan sang suplay sang kuryente suno sa PowerOutage.com. Gin-ban naman sang Federal Aviation Administration ang flights malapit sa areas sa Los Angeles kun sa diin may wildfires nga wala pa gihapon napatay sang fire authorities.
Lakip sa mga nagbakwit amo ang film kag television stars nga sanday Jamie Lee Curtis, Mandy Moore kag James Woods nga tubtub subong wala pa sang kasiguruhan kun sarang makaluwas ang ila balay sa paglamon sang kalayo.
