Nagmandu ang Estados Unidos sa anum ka commercial airlines nga mag-provide sang mga eroplano nga gamiton agud mapadasig ang pag-evacuate sa mga Afghans nga nagbiya na sa ila nga pungsod.
Suno sa United States Department of Defense, indi direkta nga magalupad sa Kabul ang mga eroplano kundi gamiton lang agud nga matransport ang mga tawo nga nakahalin na sa Afghanistan kag dal-on sa military bases sa Europe kag sa Middle East.
Ang 18 ka commercial aircraft ang magahalin sa United Airlines, American Airlines, Delta Air kag iban pa. Tag-tatlo ka eroplano ang i-deploy sang American Airlines, Atlas Air, Delta Air Lines kag privately-held nga Omni Air, duha ang halin sa Hawaiian Airlines, kag apat ang halin sa United Airlines.
Ini ang ikatatlo nga tion nga nag-deploy ang US military sang civilian aircraft bangud aminado mismo ang Estados Unidos nga nabudlayan ini sa pagdala sang mga evacuees sa ila temporary locations kasunod sang madasig nga takeover sang Taliban.
Ini pa lang ang Stage One sang Programa suno sa Pentagon; buot silingon, mas madamo pa nga commercial aircraft ang iga-activate sa masunod. #
