ILOILO CITY-Gin-anunsyo sang United States of America nga magahatag ini sa Pilipinas sang $500 million ukon kapin P29.2 billion agud i-augment ang defense capabilities, kag dugang nga $128 million ukon P7.4 billion agud doblehon ang investments sa military bases nga mahimo ma-access sang American troops.
Ginpahayag ni US Defense Secretary Lloyd Austin nga ang ini nga aid package ang tumalagsahon kag nagapadala sang maathag nga mensahe sang suporta para sa Pilipinas gikan sa Biden-Harris administration, amo man sa US Congress kag sa mga pumuluyo sang Amerika.
Sun kay Austin, ang $128 million ang gamiton sa pagpatukod sang importante nga infrastructure projects sa siyam ka Philippine military bases sa idalom sang Enhanced Defense Cooperation Agreement (EDCA).
Una na ginpahayag sang United States nga tuyo sini nga magpatuman sang 36 ka mga proyekto sa EDCA sites, kalakip diri ang construction kag improvement sang pila ka runway.
Suno naman kay United States Secretary of State Antony Blinken,ang package isa ka foreign military financing sa Pilipinas agud pabaskugon pa ang security collaboration sa ginakabig nga pinakadugay nga security alliance.
Suno pa sa iya, ini isa ka once in a generation investment agud buligan nga himuon nga mas moderno ang Filipino Armed Forces kag Coast Guard.
Dugang niya, sa tunga ini sang kabalaka sang madamo nga nasyon ilabi na sang Pilipinas sa mga tikang nga ginahimo sang People’s Republic of China nga nagapataas sang tension sa West Philippine Sea kag iban nga parte nga ila ginaangkon.
Ginpasalamatan naman ni Defense Secretary Gilbert Teodoro ang United States para sa amo nga pondo nga labi pa nga magapa-improve sang defense kag security sector sa Pilipinas.
