Ginkumpirma sang Department of Foreign Affairs (DFA) nga padayunon sang Estados Unidos sang Amerika ang paghatag sang security assistance sa Pilipinas nga nagalab-ot sa $336 million ukon P19.44-billion.
Ini apisar nga ginmandu na una ni US President Donald Trump nga ipa-untat anay ukon i-freeze ang paghatag sang ayuda sa iban nga mga pungsod.
90 ka adlaw ang pagpauntat sang existing kag bag-o nga foreign development assistance santo sa nauna nga mandu ni Trump, bangud repasuhon pa sini ang mga ayuda agud masiguro kun nagasanto ini sa iya polisa nga “America First.”
Suno naman kay Foreign Affairs spokesperson Ma. Teresita C. Daza, ginpahibalo ang Pilipinas nga may waiver nga ginhatag sa pungsod sa porsyon sang US foreign military financing.
Suno kay Daza, committed ang Pilipinas kag US sa treaty alliance kag sa mga tikang sa pagpabakod pa sang defense cooperation kag interoperability.
Ginpahayag sini nga magapadayon ang Pilipinas sa engagement sa gobyerno sang US kun ano ka importante ang bilateral work para malab-ot ang pareho nga mga tinutuyo kag prayoridad.
Sang nagligad nga tuig, matandaan nga naghatag ang US sang $500 million ukon P28.93-billion sa Pilipinas para sa modernisasyon ang Armed Forces of the Philippines (AFP) kag Philippine Coast Guard (PCG).
Sang damlag lang, nakigkita man si Foreign Affairs Secretary Enrique A. Manalo sa iya US Secretary of State Marco Rubio agud madiskusyunan ang bilateral coordination sa pag-atubang sa mga pagpang-harass sang China sa West Philippine Sea. Lakip man sa naistoryahan amo ang pagpasanyog pa sang economic cooperation sa imprastraktura, critical minerals, information technology kag enerhiya.
