Natalana nga pirmahan ni US President Donald Trump ang mega budget bill sang America nga labi nga nagapabaskog sang pirmado nga second-term policy ni Trump.
Suno sa White House, ginalauman nga pirmahan ini ni Trump sa alas 5 sang hapon sa Byernes, Hulyo 4, oras sang Amerika, nga nagadungan sa makasaysayan nga ika-250 nga anibersaryo sang Independence Day sang Amerika, ukon alas 5 sang aga sang Sabado, oras sang Pilipinas.
Natabo ini pagkatapos nga ginpasar sang lower assembly sang Kongreso sang Estados Unidos ang budget bill paagi sa boto nga 218-214, nga may duha lamang ka Republicans, sanday Reps.
Thomas Massie sang Kentucky kag Brian Fitzpatrick sang Pennsylvania, upod ang tanan nga 212 ka mga Democrats, nga nagapamatok sa hagna.
Una na nga ginpasar sang Senado ang mega budget bill, nga gintawag nga “big, beautiful bill,” sang Martes.
Lakip sa mga pagbuhin amo ang Healthcare lakip ang Medicaid, Medicare, ang Affordable Care Act, Planned Parenthood, subong man ang pagnubo sang alokasyon sa pondo sa mga benepisyo sang federal Supplemental Nutrition Assistance Program (SNAP), nga ginagamit sang gobyerno sa pagbulig sa mga pumuluyo nga magbakal sang pagkaon kon indi nila ini masarangan, kag Clean Energy Tax Credits.
Ang budget proposal nagahatag man sang prayoridad sa pagpalawig sang 2017 Tax Cuts and Jobs Act ni Trump, nga nagabuhin sang mga buhis nga ginabayad sang mga korporasyon kag mga indibidwal sa kalabanan nga mga bracket sang kita kag natalana nga mag-expire sa Disyembre.
Ang budget nagadugang man sang pondo para sa pagpatuman sang imigrasyon, pondo sang militar kag ang programa sa kahawaan, nga nalakip sa mga saad ni Trump sa kampanya.
Samtang, ginatawag naman sang White House nga daku nga kadalag-an ang budget bill.
