Ginwasak sang US military ang naval ships sang Iran dala ang 16 nga minelayers ukon barko nga gina-gamit sa pag-mina malapit sa Strait of Hormuz, isa sa pinaka-importante nga alagyan kun sa diin ginabyahe ang one-fifth nga krudo sa bilog nga kalibutan.
Ang nasambit nga strike parte sang military action sang pungsod kun sa diin nagpaandam si US Secretary Pete Hegseth sang Malala nga pagpang-atake.
Base sa report, nagapati ang US intelligence assets nga nagahanda ang Iran para sa posible nga pagpadala sang naval mines sa Strait of Hormuz.
Ginkumpirma naman ni US President Donald Trump nga nakit-an na sang mga ini nga naguba ang pila ka mga numero sang inactive mine laying boats kag mga barko.
Samtang, gin-akusaran naman sang Iran Ambassador to the United Nations ang Amerika kag Israel nga tuyo ang pag-target sa mga sibilyan kun sa diin nagpatay na sang masobra 1,300 ka mga tawo ang ila ginapatigayon nga airstrike halin sang nag-umpisa ang gyera sang Pebrero 28.
Sa pihak nga bahin, nagpasar ang UN Security Council sang resolution nga nagapanawagan sa Iran nga untaton gilayon ang ila pag-atake sa Gulf states, kag ginsiling nga sila ang naga-breach sa international law kag nagatuga sang “serious threat sa international peace and security.”
Ang resolution, nga ginpasar sang 13 ka mga boto kag may 2 ka abstentions, ang naga-demand sang immediate cessation sang tanan nga atake sang Islamic Republic of Iran batok sa Bahrain, Kuwait, Oman, Qatar, Saudi Arabia, United Arab Emirates, kag Jordan.
