Nagpatigayon ang Estados Unidos sang 15 ka military strikes batok sa militante nga grupo nga Houthis nga naka-base sa Yemen.
Suno sa Central Command nga amo ang nagapanguna sa pwersa-militar sang Estados Unidos sa Middle East, ang ila ginpang-igu nga targets ang naangot sa military capabalities sang amo nga militant group.
Wala na gindetalye sang Central Command kun ang ila target ang nagaunod sang missile, drone ukon radar capabilities.
Matandaan nga halin sang Nobyembre, 100 ka beses nga nag-atake ang Houthis sa mga barko nga nagalabay sa Red Sea.
Ginsiling nila nga paagi nila ini agud ipakita ang ila pagdampig sa Palestinians nga amo ang gin-atake sang Israel sa isa ka tuig na nga gyera sa Gaza.
Sa amo nga mga pagpang-atake sa Red Sea, madamo nga mga Pilipino ang apektado, duha ka na ka vessels ang napalugdang, kag apat na ka seafarers ang napatay.
