Ginsulit ni Israeli Prime Minister Benjamin Netanyahu ang alegasyon sini nga ginapunggan na sang Estados Unidos sang Amerika ang pagpadala sang mga armas sa Israel samtang nga padayon ang gyera sini sa Gaza.
Una na ini nga ginpanginwala sang Biden administration apang sa latest statement ni Netanyahu sa atubang sang iya Gabinete, ginsiling sini nga daku ang gin-nubo sang U.S. weapons nga ginapadala sa Israel halin sang apat ka bulan na ang nagligad.
Wala sini gindetalye kun ano ini nga sahi sang hinganiban apang una na sini ginpahayag nga sinemana na nga wala nakalusot ang panawagan sa American officials nga padasigon man ang pagpadala sang mga armas.
Nahibaluan nga gina-review sang Amerika ang shipment sang 2,000-pound kag 500-pound nga mga bomba sang Mayo bangud sa kahangawa nga gamiton ini sang Israel sa isa ka daku nga opensiba sa Rafah.
Sulit-sulit man nga ginpahayag ni President Joe Biden nga indi ini magpadala sang mga hinganiban nga gamiton sa Rafah kun sa diin nagatinir ang mga sibilyan.
Apang ginklaro man sang presidente nga padayunon sang US ang suporta sa Iron Dome, ang system nga amo ang nagahatag sang proteksyon sa Israel sa kada may magpalupad sang rocket batok sa ila.
Nahibaluan nga nabutang sa daku nga kwestyon ang anay suod nga relasyon sang US kag Israel bangud sa gyera sa Gaza. Apisar ginasuportahan ni Biden ang kampanya sang Israel nga hilwayon ang mga bihag kag panason ang Hamas militants, ginapabutyag naman sini ang kahangawa sa pagsaka sang numero sang patay sa mga sibilyan sa Palestine kag ang humanitarian crisis nga dala sang gyera.
