Ginpa-guwa ni US President Joe Biden ang bag-o kag dalagku nga mga sanctions batok sa Russia nga nagatuyo nga ipiton si Russian President Vladimir Putin bangud sa pagpang-atake sini sa Ukraine.

Ang bag-o nga target sang sanctions ang nagalakip sa pinakamanggaranon nga mga bilyonaryo sa Russia.

Dala diri ang walo ka myembro sang Russian elite nga ginapahayag cronies ni Putin.

Suno kay Biden, utdon ang ila nga koneksyon sa bilog nga financial system sang Estados Unidos, iga-freeze ang ila nga assets sa US kag indi naman magamit ang ila nga mga propiedad.

Dala man sa gin-sanction amo ang mga pamilya sang sini nga mga bilyonaryo.

Samtang, sa ika-walo nga adlaw sang pagpang-atake sang Russia sa Ukraine, ginpahayag naman ni Russian President Vladimir Putin nga nagasunod ang tanan sandig sa kun ano ang ginplano.

Gindayaw man ni Putin ang mga Russian soldiers kag madinalag-on suno sa iya ang military operation apisar pa may mga report nga nahalitan man ang ila nga defense system.