Nagpadala na sang Estados Unidos sang Amerika sang guided missile submarine sa Middle East samtang labi nga nagsaka ang tension sa rehiyon.
Suno kay Defense Secretary Lloyd Austin, may yara man sang ginpadala nga aircraft carrier sa amo nga lugar kasunod sang kahangawa nga magasangkad pa ang away sa rehiyon kasunod sang pagpatay sa senior Hezbollah kag Hamas leaders.
Ang lihok sang US ang ginalantaw nga pamatuod nga buligan sini ang Israel batok sa anuman nga posible nga pagpang-atake nga himuon sang Iran ilabi na bangud ginsiling ni Austin nga himuon sang Amerika ang kutob sang posible nga tikang para pangapinan ang ila kaalyado.
Nahibaluan nga ginahulat subong kun ano ang himuon sang Tehran bangud sa kamatayon sang top political leader sang Hamas nga si Ismail Haniyeh sang nagligad nga Hulyo 31.
Ginbasol sang Iranians ang Israel sa amo nga insidente kag nagpaandam nga magatimalos sila apang wala sang sabat ang Israel.
Suno naman sa Pentagon kag kay Austin, ang USS Georgia guided missile submarine nga ila ginpadala ang makadala sang 154 Tomahawk cruise missiles nga pwede makaigu sang ila land targets.
Ang nagasunod sa submarine amo ang USS Abraham Lincoln carrier strike group nga may dala nga F-35C fighter jets. Ini amo ang magabulos sa isa ka pa barko sang Estados Unidos nga yara na daan sa Middle East.
Magluwas sa atake halin sa Iran, ang ginabantayan pa amo ang kaalyado man sini nga Hezbollah nga isa ka political movement sa Lebanon. Ginalantaw man ang ila pagtimalos bangud sa kamatayon sang ila senior commander nga si Fuad Shukr nga natabo inoras lang gid antes ang assassination sa kay Haniyeh.
