ILOILO CITY- Magapatigayon ang Estados Unidos sang Amerika kag Pilipinas sang joint maritime exercise sa palaabuton nga mga semana bilang pagpakita sang suporta sa pungsod kasunod sang liwat nga ginpakita nga agresibo nga aktibidad sang China sa West Philippine Sea.
Matandaan nga nangin makatulublag ang ginhimo sang China Coast Guard sa resupply mission sang Pilipinas sa Ayungin Shoal sang Hunyo 17 kun sa diin isa ka Navy personnel ang nautdan sang tudlo.
Suno sa isa ka U.S. Indo-Pacific Command representative, ini nga exercise ang preplanned kag wala nagatuyo nga painiton pa ang tension sa China.
Patigayunon ini sa disputed waters sa West Philippine Sea, kag mahimo nga mag-involve man sang iban nga U.S. allies, kaangay sang Australia ukon Japan.
Una na nga nagpanindugan si President Ferdinand Marcos, Jr. nga indi pagsundon sang Pilipinas ang ginhimo sang China bangud indi sini tuyo nga mag-umpisa sang gyera batok sa anuman nga nasyon.
Ginpahayag naman sang Department of Foreign Affairs nga natalana nga makigkita ang mga Philippine officials sa ila Chinese counterparts para sa masunod nga round sang Bilateral Consultative Mechanism sa West Philippine Sea.
Ang schedule sang masunod nga meeting, nga ginalauman nga hiwaton sa Pilipinas, ang wala pa napetsahan.
