ILOILO CITY- Gintuad ni United States President Joe Biden nga nagpasugot ang Israel nga untaton temporaryo ang padayon nga pagpang-atake sang militar sa Gaza Strip.
Ini may kaangtanan sa nagahilapit nga Ramadan, ang balaan nga bulan sang mga Muslim nga magasugod sa Marso 10.
Kasunod ini sang kahangawa sang Arab countries nga kun magpadayon ang giyera pag-abot sang Ramadan,ini magapalala sang regional tensions.
Suno kay Biden, may yara sang agreement in principle para sa ceasefire sa tunga sang Israel kag Hamas nga mahimo magsugod sa masunod nga semana.
Pahayag niya, ini nga ceasefire ang magahatag sang oras para mahilwat ang nabilin nga hostages sang Hamas.
Nahibaluan nga nga ginbihag san grupo ang masobra 250 ka hostages sang ila gin-atake ang southern Israel sang Oktubre 7 kag ginpamatay ang masobra 1,200 ka mga tawo.
Nagbalos naman ang Israel sang ground assault nga nagresulta sa malapit 30,000 ka mga nagkalamatay base sa data sang Gaza health authorities.
Gindugang pa ni Biden nga naghimo ang Israeli government sang commitment nga i- evacuate ang dako nga porsyon sang Rafah, nga may yara sang minilyon ka mga displaced Palestinians nga nagpalagyo gikan sa Gaza antes pa man atakehon sang Israeli forces ang iya gintawag nga ‘remainder’ sang Hamas.
Ang ulihi nga kasugtanan sang pagpauntat sang inaway ang natabo sang Nobyembre kun sa diin ginhilway sang Hamas ang masobra sa 100 hostages kag ginhilway man sang Israel ang tatlo ka pilo nga kadamuon sang Palestinian prisoners.
