Halos isa ka bulan antes ang official turnover of power sa Enero 20, nagdesisyon si US President Joe Biden nga hatagan sang pardon ang iya anak nga si Hunter Biden.
Si Hunter ang nagapangatubang sang tatlo ka felony gun charges, tatlo ka felony tax offenses, kag anom ka misdemeanor tax offenses.
Sa ginpagwa nga pahayag sang White House, nanindugan si President Biden nga ang mga akusasyon batok kay Hunter ang indi patas kag lunsay mga pato-pato lang halin sa political opponents nga luyag balabagan ang iya administrasyon.
Gindepensa ni Pres. Biden nga si Hunter ang wala naga-inom sang makahulubog nga ilimnon sa sulod sang masobra lima ka tuig kag indi dapat pag-atakihon.
“There has been an effort to break Hunter – who has been five and a half years sober, even in the face of unrelenting attacks and selective prosecution. In trying to break Hunter, they’ve tried to break me – and there’s no reason to believe it will stop here. Enough is enough,” pahayag ni Pres. Biden.
Suno pa sa US President, ang mga kaso batok sa iya anak ang nag-umpisa sa isa ka plea deal nga napaslawan sa US Court bangud sa pagtum-ok sang mga kasumpong sa politika.
Gin-athag man ni Biden nga wala siya nagapahilabot sa desisyon sang Department of Justice, apang bilang isa ka amay, luyag niya nga depensahan ang iya anak.
