ILOILO CITY – Ginalauman ni US President Joe Biden nga makasugilanon si Chinese President Xi Jinping subong nga semana apang nagahulat pa ini sang kumpirmasyon.
Ang posible nga pagahambalan sang duha ka pungsod amo ang Taiwan, Ukraine kag ang kompetesyon sa technology sector.
Ini ang ginpahayag ni Biden sa ginpatigayon nga pagsinapol sa tech CEOs kag sa labor leaders agud nga hambalan ang legislation agud nga masolbar ang global microchip shortage.
Ang microchip shortage ang resulta sang lockdown bangud sang COVID-19 sa China nga naga-apekto sa mga industriya kun sa diin, diri nagasalig ang mga goods humalin sa salakyan tubtob sa cellphone nga naga-trigger sang pagtaas sang inflation.
Sang Lunes, ginpanginwala sang Beijing ang potential trip ni House Speaker Nancy Pelosi padulong sa Taiwan sa masunod nga bulan kag nagpamahog sa Estados Unidos nga sal-on sini ang tanan nga responsibilidad sa mangin seryoso nga konsekwensya sa tion nga magpadulong ini sa self-ruling island, isa ka major exporter sang semiconductors nga gina-claim sang China nga kabahin sang iya teritoryo.
Apisar nga wala ginkumpirmar ni Pelosi ang amo nga visit apang ginpahayag niya nga importante para sa pungsod nga magpakita sang suporta sa Taiwan.
Nahibaluan nga nagpahayag sang sympathy message si Xi kay Biden sang Byernes matapos nga nagpositibo sa COVID-19 infection ang presidente.
