Ginpanindugan ni US President Joe Biden nga insakto ang iya desisyon nga i-withraw ang US troops halin sa Afghanistan.
Nahibaluan nga gin-ulan sang kritisismo ang amo nga desisyon sang presidente bangud daw kaangay nga ginpasugtan na lang sang Estados Unidos nga sakupon sang Taliban militants ang nasambit nga pungsod.
Suno kay Biden, ginabaton niya ang responsibilidad sa iya desisyon sa diin indi na ”option” suno sa iya ang pagtinir pa sa amo nga pungsod.
Nagapati man siya nga kun ginpadalian ang ginpatigayon nga evacuation sa Afghanistan, posible nga nangin tuman ini kaggamo.
Posible man suno sa presidente nga mas nagdinaguso ang mga tawo sa airport kun gin-umpisahan ang evacuation operations sang bulan sang Hunyo ukon Hulyo.
Apang may kaangtanan sa nasambit nga evacuation, ginpahayag ni Biden nga ang Estados Unidos lang ang may kapasidad nga himuon ini.
Nagpromesa man siya nga buligan ang mga Americans nga nabilin sa Afghanistan bangud indi pa tapos ang operasyon sang US.
Nagpaandam man si Biden sa Islamic State Khorasan (ISIS-K) nga indi anay magkumpyansa bangud indi pa tapos ang Estados Unidos.
Matandaan nga sa kapin 170 ka tawo, 13 diri ang US servicemen nga napatay sa pagpamomba nga ginpatigayon sang ISIS K.
