Nagpahayag si US President Donald Trump nga handa siya magbulig sa pagsolbar sang tensyon sa tunga sang Estados Unidos kag North Korea.
Sa isa ka Oval Office event kun sa diin gin-highlight niya ang mga tikang agud nga maresolbar ang global conflicts, ginpamangkot si Trump kun nakasulat siya kay North Korean leader Kim Jong Un nga una nga gin-report sini nga bulan.
Wala direkta nga ginsabat ni Trump ang amo nga pamangkot, apang ginsiling niya nga manami ang relasyon sini kay Kim Jong Un.
Base sa website nga NK News nga nakabase sa Seoul kag naga-monitor sa North Korea, makapila ka beses nga ginbalibaran sang delegasyon sang North Korea sa United Nations sa New York ang sulat ni Trump para kay Kim.
Matandaan nga sa una nga termino ni Trump sang tuig 2017 tubtob 2021, tatlo ka beses sila nagtipon ni Kim sa summit kag nagbinayluhanay sang mga sulat nga ginpahayag ni Trump nga “matahum” antes ang wala ginlauman nga diplomatic effort nga nagguba sang US demands nga buy-an ni Kim ang iya nuclear weapons.
Sa iya ikaduha nga termino, gin-ako ni Trump nga isa na ka “nuclear power” ang North Korea.
Ginpahayag sang White House sang Hunyo 11 nga handa si Trump nga liwat mag-communicate kay Kim, samtang wala ginakumpirmar ang anuman nga sulat nga ginpadala.
Samtang ang North Korea wala pa sang interes nga magbalik sa negosasyon halin sang pag-untat sang diplomasya sang 2019.
Sa subong, padayon nga ginpasanyog sang North Korea ang ila nuclear kag ballistic missile program, kag nagahugpong pa sa Russia pinaagi sa pagsuporta sa giyera sang Moscow sa Ukraine.
