Natalana nga hingadlan ni US Presumptive President Joe Biden sa subong nga semana ang mga tawo nga mangin kabahin sang iya administrasyon.
Ini ang ginkumpirma ni Ron Klain, ang chief of staff ni Biden, samtang nagapadayon nga nagapakatig-a si incumbent president Donald Trump nga mag concede.
Suno kay Klain, padayon ang mga pagpanghanda nga ginahimo ni Biden sa iya nga pagtake-over bilang presidente sa Enero apisar sa mga tikang ni Trump nga pagpaninguha nga islan ang resulta sang eleksyon.
Samtang nagahilapit ang Enero 20 nga amo ang inauguration ni Biden, nakatutok naman ang team ni Trump sa pagpa-untat sa mga battleground states sa pag-certify sang election results sa diin padayon nga ginaduso ang mga legal challenges apisar nga napaslawan ini sang makapila ka beses.
Pahayag ni Klain, masami nagahimo sang istorya si Trump nga wala man sang basehan ilabi na sa pagpati sini nga may dinayaay nga natabo nga sa pagkamatuod, ini ang gin-reject sang 34 ka mga korte.
