MANILA – Naglab-ot sa $213 million ukon kapin sa P10 billion nga assistance ang ginhatag sang US Agency for International Development (USAID) sa Pilipinas agud nga makabawi gikan sa COVID-19 pandemic.
Suno kay USAID mission director Lawrence Hardy II, ang bilateral agreement sa tunga sang Estados Unidos kag sang Department of Finance ang makabulig sa pag-angkon sang long term, private sector-led economic growth kag makapasangkad sang economic governance para sa inclusive, broad-based economic development.
Paagi sa nasambit nga assistance, ang USAID ang magapadayon sa pagsuporta sa Philippine government objectives ilabi na sa public sector transparency kag accountability; pagpasangkad sang rule of law kag justice system lakip na diri ang paghatag sang bulig sang local government sa mga nagakinahanglan nga pumuluyo.
Ang bilateral agreement ang isa sa apat ka panibag-o nga USAID programs sa Pilipinas subong nga tuig nga nagalab-ot sa P32.7 billion ($675 million) sa sulod sang lima ka tuig.
Nahibalu-an nga sa masobra na sa 20 ka tuig, ang Estados Unidos ang nakahatag sang kapin sa P228.8 billion ($4.5 billion) nga total assistance para sa Pilipinas.
