ILOILO CITY – Daku nga pagpanghangkat para sa mga estudyante sang University of the Philippines-Visayas kun sa diin mangita sang materyales nga himuon nga improvised face shileds agud nga ipanghatag sa frontliners kasubong sang medical personnel nga padayon nga nagatrabaho apisar sang Coronavirus Disease 2019 (COVID-19) threat.
Sa Good Morning Philippines program, ginpahayag ni Adrian Camposagrado, Chairman sang University Student Council sang University of the Philippines-Visayas, nga ang nasambit nga lihok ang isa sa ila paagi agud nga magpasalamat sa frontliners kasubong sang medical personnel kag iban pa nga padayon nga nagatrabaho apisar sang ginapatuman nga Enhanced Community Quarantine.
Suno kay Camposagrado, nag-umpisa ang nasambit nga proyekto sang may isa ka estudyante nga anak sang isa ka doktor nga nagpakig-angot sa University Student Council agud nga maghingyo sang bulig sa paghimu sang Improvised Personal Protetctive Equipment.
Ginpahayag ni Camposagrado nga paagi sa bulig sang partner agencies, natigayon ang ila proyekto apang sa subong nga sirado ang mga balaklan sa syudad sang Iloilo, ila pa nga ginapangitaan sang paagi kun sa diin magabakal sang materyales agud nga himuon nga face shields.
Magluwas diri, ginaduso man sang eSTRAWnghero volunteer group nga gintukod sang natungdan nga mag-draft sang position paper may kaangtanan sa prevention, control and management sa banwa sang Tigbauan bilang preventive measures sa COVID-19.
Samtang, indi pa pat-d kun bala magapadayon ang klase sang University of the Philippines -Visayas pagkatapos sang Enhanced Community Quarantine sa Abril 14.
Ginpahayag ni Camposagrado nga ang nasambit nga desisyon ang magadepende sa University of the Philippines – Diliman apang sa subong, kanselado ang tanan nga klase lakip na ang online classes.
Ang ginatutukan sa subong sang UP system amo ang pyschological needs sang mga estudyante nga nagasakripisyo bangud nga wala nakapauli sa ila tagsa ka mga lugar bangud sa Enhanced Community Quarantine.
