Nagpanguna si Kharam Baricaua Molbog sang University of Santo Tomas (UST) sa lista sang topnotchers sa October 2025 Physician Licensure Examination.
Ini na ang ikaduha nga tion nga nagpangibabaw siya sa pasinawan matapos nga nangin Rank 1 man anay sa Medical Technologist Licensure Exam sang Agusto 2022.
Suno sa Professional Regulation Commission (PRC), ang 25-anyos nga alumnus sang UST amo ang may pinakamataas nga score nga 91.17 percent sa 4,570 ka mga examinees nga nakapasar sa doctors’ exam.
Ginpatigayon ang test sang Oct. 4, 5, 11 kag 12 sa Metro Manila kag iban pa nga test centers sa bilog nga pungsod.
Tumandok sang Quezon, Solano, Nueva Vizcaya ang nasambit nga back-to-back topnotcher. Nag-gradwar siya bilang summa cum laude meritissimus sa UST nga may outstanding 99.17 percent sa iya medical course.
Lipod sa ihibalo sang kadam-an, “late bloomer” man si Molbog, santo mismo sa iya panaysayon.
Suno sa iya, indi siya gani standout student sang elementary kag high school sa St. Louis School sa Solano. Napaslawan man siya nga makapasar sa University of the Philippines College Admission Test (UPCAT) sang 2014, apang sa baylo nga malingkang, nareyalisar niya nga maghimakas pa kag himuon ang mga bagay nga may madalom nga determinasyon.
“I kept working hard in college and med school, so that perseverance finally paid off when I topped both licensure exams,” pahayag sini.
Plano sini nga mag-specialize sa cardiology ukon radiation oncology.
Ginpakigbahin man sini nga himuon sini ang iya responsibilidad bilang doctor agud mahatagan sang igtalupangod ang problema sa kakulangan sang medical professionals sa Nueva Vizcaya nga may yara gid lamang sang duha ka cardiologists.
