Ginlunsar sang Iloilo City Government ang Uswag Atipan Center sa 7th floor sang City Hall subong nga adlaw, Agosto 18, 2025.
Ini nga one-stop hub ginpatukod agud mapadasig kag mapalapit pa ang serbisyo sa pumuluyo sang syudad.
Ginpahayag sang alkalde nga ang ideya sang center naguwa matapos siya nakabisita sa mga barangay kag nakabati sang mga personal nga istorya kag kinahanglanon sang mga residente.
Ginpabutyag man nga ang serbisyo nga ihatag sang center kabahin sang handum nga mapadayon ang matuod-tuod nga pagserbisyo sa mga Ilonggo.
Ginsaysay sang center manager nga ang Atipan Center ginlantaw bilang isa ka panimalay para sa mga nagakinahanglan sang bulig, hindi lang ini programa kundi isa ka paagi sa pagpakita sang pag-atipan sang syudad.
Ang center nagatanyag sang medical kag dental services, financial kag burial assistance, educational support, job opportunities, kag mga programa para sa kababaihan kag senior citizens. May centralized help desk man para sa mas personal nga bulig.
Ginlantaw sang mga opisyal nga ini nga proyekto isa ka milestone sa paghatag sang mas compassionate, transparent, kag inclusive nga serbisyo sa Iloilo City.
