ILOILO CITY – May license to operate na ang Uswag Iloilo City Molecular Laboratory sa Barangay San Pedro, Molo, Iloilo City.
Sa interview sang Bombo Radyo kay Jeck Conlu, COVID-19 spokesperson sang Iloilo City Government, iya ginpahayag nga mangin official na ang tanan nga swab test results nga ginaproseso sa nasambit nga COVID-19 laboratory.
Bangud sa lisensya nga ginpagwa sang Department of Health (DOH), ginalauman nga labi pa nga magadasig ang releasing sang test results indi lamang para sa syudad sang Iloilo kundi pati sa Rehiyon VI.
Mabuligan sini suno kay Conlu ang Western Visayas Medical Center – Subnational Laboratory bangud sang una, pinakadamo nga specimen ang nagahalin sa Iloilo City.
Tubtob 300 ka specimen ang maproseso ukon ma-run sa molecular laboratory kada adlaw, apang ginalauman nga ma-increase sa 700 specimens per day ang kapasidad sa masunod nga bulan.
May 27 naman ka personnel nga magatrabaho nga ginalakipan sang pathologist, swabbers, kag medical technologists.
Ang testing procedures nga gina-perform amo ang Nucleic Acid Extraction, PCR Mastermix Preparation, Real Time RT-PCR, Interpretation sang RT-PCR results, kag RT-PCR results reporting.
