ILOILO CITY – Ginapilian pa subong kun sin-o ang mga nominee sa ginatukod nga USWAG Partylist.
Sa exclusive interview sang Bombo Radyo kay Iloilo City Mayor Jerry Treñas, nga amo ang sa likod sang nasambit nga partylist, iya ginpahayag nga madamo sang mga sektor ang nagpanawagan sa iya nga magtukod sang USWAG partylist sa diin sakop sini ang bug-os nga Panay.
Suno kay Treñas, sa subong, ginahitso pa ang mga kinahanglanon para sa registration sang nasambit nga partylist.
Sa subong suno sa alkalde, wala pa sila sang pinal nga pangalan nga napilian nga amo ang mangin representative sang USWAG Partylist.
Apang ginkumpirma man sang alkalde nga isa sa mga nominee amo ang asawa ni Iloilo 5th District Rep. Raul ‘Boboy’ Tupas nga si Architect Binky April Montesclaros Tupas.
Gin-athag man ni Treñas nga bukas man sa gihapon ang nominasyon para sa tanan nga taga Panay nga luyag mangin nominee sang USWAG Partylist.
