ILOILO CITY – (Update: 7:36 AM) Duha ka mga motibo ang ginalantaw sang mga pulis kaangot sa pagluthang-patay sa isa ka 41-anyos nga babayi sa Barangay Calaparan, Arevalo, Iloilo City.
Ang biktima amo si Valerie Abantao, residente sang nasambit nga lugar, nga yara mismo sa sulod sang iya nga tyangge sang ginluthang sang riding-in-tandem suspects.
Sa interview sang Bombo Radyo kay Police Major Chen Tañagras, hepe sang Arevalo Police Station, iya ginpahayag nga utang kag iligal nga droga ang duha sa ginalantaw nga anggulo.
2017 sang nadakpan si Abantao sa drug buy bust, apang nakaguwa man sang 2019 bangud sa plea bargaining agreement.
2021 sang na-monitor ini liwat sang mga pulis nga may sari-sari store sa Barangay Calaparan apang wala man sang may nabaton nga report nga nagbalik ini sa daan nga iligal nga aktibidad.
May mga impormasyon man nga madamo ang utang sang biktima.
Sa crime scene, na-recover sang mga pulis ang apat ka basiyo sang caliber 9MM kag duha ka deformed slug. Padayon pa ang imbestigasyon.
More on this shortly.
