ILOILO CITY- Mahimo nga maglab-ot pa sa P20 trillion ang utang sang Pilipinas sa pagtakop sang Marcos administration.
Suno kay Finance Secretary Ralph Recto, base sa pagbanta, sa 2028, ang kabilugan nga utang ang P20 trillion apang ang kabilugan nga ekonomiya ang yara sa P37 trillion.
Pahayag ni Recto, apisar nagadako ang utang, nagasangkad naman ang ekonomiya kag nagahagan-hagan ang lebel sang kaimulon.
Ang projected nga utang sang Pilipinas sa pagtakop sang 2024 ang magataas sang 9.8 percent ukon P16.06 trillion samtang ang nominal gross domestic product (GDP) ang ginapanan-aw nga yara sa P26.5 trillion.
Dugang pa ni Recto, sa tion nga ang utang sang Pilipinas ang maglab-ot sa P20-trillion level sa katapusan sang 2028, ini nagakahulugan nga ang ang Marcos administration ang magadugang sang kapin P7.21 trillion sa obligations sa tion sang anom ka tuig nga termino sini.
Sa subong, ang Marcos government nakadugang sang P2.69 trillion sa utang sini humalin sang nagpungko si Marcos bilang presidente.
