Nagtimbuok sa bag-o nga record high ang utang sang gobyerno sang Pilipinas sa katapusan sang 2024 bangud sa pagluya sang ekonomiya, base sa data sang Bureau of the Treasury.
Ang nabilin nga utang sang national government ang yara sa P16.5 trillion, nagtaas sang 9.8% ukon P1.44 trillion, halin sa P14.62 trillion sang katapusan sang tuig 2023.
Ginpahayag sang Treasury nga ang bulanan nga pagtaas sa stock sang utang sang gobyerno ang nagapaidalom sa net issuance kag availment sang domestic kag external debt.
Amo man ang revaluation effect sang peso depreciation batok sa US dollar.
Ang domestic debt sang pungsod ang naglab-ot sa P10.93 trillion, nagtaas sang 9.1% halin sa P912.49 billion sang nakaligad nga tuig sang mag-isyu ang gobyerno sang mga debt securities agud padakuon ang kaban sini.
Ang debt-to-GDP ratio ang yara man sa 60.7 percent, nga mas mataas sa 60.6 percent target.
Ang GDP growth ang naghinay sa 5.6 percent sang 2024, bangud sa serye sang mga bagyo sa third kag fourth quarters nga naghalit gid sa ekonomiya.
Nahibaluan nga target sang pungsod ang growth rate nga indi magnubo sa 6 percent sang nagligad nga tuig.
Suno sa mga economic managers, ang nagataas nga utang ang indi dapat pagkabalak-an sa kondisyon nga padayon ang madasig nga pagsanyog sang ekonomiya.
