ILOILO CITY – Ginapanan-aw nga magtimbuok pa ang utang sang pungsod tubtob sa P15.4 trillion sa katapusan nga bulan sang tuig sa tion nga nagpasugot ang Duterte government sa proposal nga maggasto para sa pandemic relief kag pag-suspend sang fuel excise tax suno sa Department of Finance (DOF).
Suno kay DOF chief economist Gil Beltran, ang utang sang pungsod ang magdangat pa sa P2.2 trillion nga mas mataas sa projected nga P13.2 trillion sa katapusan sang tuig.
Pahayag niya, naggasto ang pungsod sang nagakadapat lang kag wala nagsobra sa indi masarangan.
Ginpahayag ni Beltran nga ang duha ka Bayanihan Laws nga amo ang Republic Act 11469 ukon ang Bayanihan to Heal as One Act kag RA 11494 ukon ang Bayanihan to Recover as One Act ang nagtutok sa labing kinahanglanon nga health interventions kag emergency economic relief measures para sa mga populasyon nga amo ang lubos nga naapektuhan sang pandemya ang ginpondohan sang bilog.
As of April 2022, ang utang sang gobyerno ang nagsaka sa P12.763 trillion.
Sa una nga tatlo ka bulan sang tuig, ang debt-to-gross domestic product (GDP) ratio ang nagdangat sa 63.5% nga amo ang pinakamataas sa sulod sang 17 ka tuig.
Bangud sang pandemya, napilitan nga magpangutang ang Duterte administration sang dugang kag ginapanan-aw nga madugangan pa sang P3.2 trillion.
Sa tion nga matabo ini, magadangat sa P13 trillion ang utang sang pungsod sa pagtakop sang tuig nga masobra sa original plan nga P9.9 trillion.
