Nagsaka ang utilization rate sang government agencies’ budgets ukon ang pondo sang pila ka ahensya sang gobyerno sa una nga walo ka bulan sang 2021.
Suno sa Department of Budget and Management (DBM), halin sang Enero tubtob Agusto, kapin P1.64 trillion ang nabuhin sa P1.85 trillion nga Notice of Cash Allocation (NCA).
Bangud sini, nagsaka sa 89-percent ang utilization rate sang pondo, mas mataas ipaanggid sa 80 percent nga rate sang nagligad nga tuig.
Nahibaluan nga agud ma-cover ang cash requirements sang mga programa, operasyon, kag proyekto nga ginapatigayon sang mga ahensya sang gobyerno, naga-isyu ang DBM sang NCAs sa government-servicing institutions.
Sa una nga walo ka bulan sang 2021, ang Civil Service Commission kag ang Commission on Human Rights ang nakarekord sang pinakataas nga utilization rate sang pondo.
