Arestado na sang Quezon City Police District ang utod ni Kim Chiu nga si Lakambini Chiu.
Ini may kaangtanan sa kaso nga qualified theft nga ginpasaka man mismo ni Kim matapos matukiban sang actress nga may ara sang financial discrepancies sa ila negosyo.
Suno sa Office of the City Prosecutor, may yara sang nagakaigo nga basehan para pasakaan si Lakambini sang 124 counts sang qualified theft kag may piyansa nga masobra P5.8 milyon.
Una na nga nagpahayag si Kim nga indi madali ang nangin desisyon sini nga pasakaan sang kaso ang utod.
Suno pa sa iya nga ginpangitaan pa sini sang paagi agud nga indi na maglab-ot sa amo nga punto apang kinahanglan gid ini ipatuman suno sa aktres.
Sa karon yara pa sa kustodiya sang kapulisan si Lakambini samtang ginahulat ang commitment order sang korte.
Nahibaluan nga No. 6 Most Wanted Person of the Kamuning Police Station si Lakambini.
