ILOILO CITY – Nadakpan sang Philippine Drug Enforcement Agency (PDEA) Region 6 ang magulang sang high value target nga si Rolando Torpio alyas Apa, sa buy bust operation sa Sitio Sooc, Brgy. South San Jose, Molo, Iloilo City.
Duha ka sachet sang suspected shabu ang nakuha sa nadakpan nga si Almira Torpio Jadulos, 47, sang nasambit nga lugar.
Sa interview sang Bombo Radyo kay Jadulos, iya ginpanginwala nga isa siya ka drug personality.
Sa pagkamatuod suno sa iya, wala siya makahibalo nga buy bust money ang ginbayad sa iya sang kilala niya nga tigulang.
Iya pa nga ginpasinsilyuhan sa tiyangge ang P500 apang hinali lang siya nga gindakop sang mga agent sang PDEA.
Kadungan sini, iya gin-ako nga nagserbe siya sadto nga sulugu-on sang iya manghod nga si Rolando Torpio.
Samtang gin-ako ni Jadulos nga nagapakig-angot sa gihapon sa iya ang manghod nga si Rolando.
Sa interview sang Bombo Radyo kay Jadulos, iya ginpahayag nga nagapadala pa sang text message ang iya manghod nga si Torpio agud hibaluon ang sitwasyon sang iya kabataan.
Sa pihak sini, ginpahayag ni Jadulos nga wala siya nakahibalo sa nahamtangan sang iya manghod nga wala man nagapanugid sa ila.
