Dakop ang utod sang pinakadako nga source sang iligal nga droga sa Iloilo City matapos nga nagpalupok sang iya nga pusil sa Brgy. Zamora Milleza, Iloilo City.
Ang suspek amo si Jorge Barcebas, 49, single, kag residente sang nasambit nga lugar.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga ang suspetsado ang ginreklamo sang barangay kagawad sang amo man nga lugar kag sang isa ka residente.
Suno kay Gimeno, naaktohan sang duha ka concerned citizens nga may nakasukbit nga pusil sa hawak sang suspetsado samtang ini ang nagakalakat sa isa ka foot walk.
Ginpahayag man sini nga narekober sa suspek ang isa ka homemade break type pistol nga wala sang serial number kag lima ka bilog nga 12-gauge ammunitions.
Ginkuha naman sang Iloilo City Forensic Unit ang nasambit nga pusil agud nga mapaidalom sa ballistic examination.
Nakahunong na ang suspek sa Iloilo City Police Station 1 kag nagapangatubang sang kaso nga paglapas sa RA 10591 ukon “Comprehensive Firearms and Ammunition Regulation Act”.
