Indi makabangon ang ekonomiya sang Pilipinas samtang nagasalangisag sa gihapon ang mga tawo sa polisa nga dapat tumanon kag samtang wala pa sang vaccination.
Ini ang pahayag sang economic specialist nga si Rae Emmanuel Echaveria, research officer sang Colombo Plan Staff College, isa ka international organization nga nabase sa Manila, samtang nagapadayon sa pagtimbuok ang kaso sang COVID-19 sa pungsod.
Bangud sa pandemya, natabo ang pinakamalala nga contraction sa ekonomiya sang Pilipinas halin sang World War II.
Ang gross domestic product (GDP) ang nagnubo sa 9.5% sang 2020.
Subong nga ginpahalugan na ang mga restrictions, nagalaum ang gobyerno nga magbalik na ang trabaho para sa mga Pinoy; apang kun basehan naman ang data, makit-an nga ginbalda gid sang pandemya ang labor market.
Santo sa data sang Philippine Statistics Authority (PSA), ang annual unemployment rate sang 2020 ang nagsaka sa 10.3% nga katumbas sang 4.5 million nga unemployed nga mga Pinoy.
Sang Enero 2021, ginpahayag pa sang PSA nga kapin 4 million ka tawo ang unemployed — mas mataas sa 3.8 million nga unemployed nga mga tawo sang Oktubre 2020 kag 2.4 million nga unemployed sang Enero 2020.
Suno kay Echaveria, nagasala ang mga tawo kun pasulabihon ang pagbalik sa trabaho ukon indi anay bangud sang kahadlok sa virus.
Magluwas diri, wala sang unified policy suno kay Echaveria bangud apisar may yara sang resolution nga ginrelease ang National Inter-Agency Task Force may kaangtanan sa Uniform Travel Protocols, may kaugalingon man gihapon nga direktiba ang tagsa ka rehiyon.
Suno sa natungdan, mas maayo gid kun ibase sa siyensya ang pagbalay sa mga pagsulundan kag indi pagbasta nga ilugon sa structure sang iban nga pungsod bangud lain man ang kinahanglanon sa Pilipinas.
