Wala pa nalakip ang mga menor de edad sa national immunization program sang Pilipinas apang indi buot silingon sini nga imposible na gid nga mabakunahan ang mga kabataan ilabi na ang naga-edad 11 anyos panubo.
Sa interview sang Bombo Radyo kay Dr. Fejelia Faulan, pediatric infectious specialist sa syudad sang Iloilo, iya ginpahayag nga may mga data pa nga ginahulat agud nga maanalisar kag indi man makompromisa ang proteksyon sa mga kabataan.
Ang Pfizer, Moderna, kag Johnson & Johnson ang may yara subong sang large pediatric trials agud mahibaluan ang safety sang COVID-19 mRNA vaccines sa mga bata.
Suno sa kumpaniya sang Pfizer, ginalauman nga mauyatan na sa bulan sang Septyembre ang vaccine trial data sa kabataan nga nagaedad 5-11 anyos.
Posible man suno sa Pfizer nga mangin available naman sa dili madugay ang data para sa mga bata edad 2 tubtub 5 anyos.
Subong nga wala pa sang data sa proper dose, wala sang full data sa safety, kag wala man sang kumpleto nga data sa efficacy, mas maayo gihapon suno kay Faulan nga sundon gid ang minimum helath protocols bisan sa sulod sang balay. ##
