Liwat nga ginapangabay ang mga ginikanan sang mga kabataan nga nagaedad sang 5-11 anyos nga pabakunahan na ang ila mga bata batuk sa COVID-19.
Sa interview sang Bombo Radyo kay Dr. Maria Socorro Quiñon, pinuno sang Iloilo Provincial Health office (PHO), iya ginpahayg nga target sang probinsya nga mabakunahan ang 267,470 ka mga minors.
Suguran na bwas ang vaccination sang mga kabataan sa mga masunod nga vaccination sites:
- West Visayas State University Cultural Center
- Aleosan Hospital sa Alimodian, Iloilo kag;
- Robinsons Mall Pavia, Iloilo
Suno kay Dr. Quiñon, kinahanglan nga mag-aligmat ang mga ginikanan bangud madamo man sa mga kabataan ang na-infect na sang COVID-19.
Sa mga naga-edad manubo sa isa ka tuig, nagdangat sa 203 ang mga nagpositibo sa COVID-19 sa Probinsya sang Iloilo.
Sa mga naga-edad naman sang 1-10 ka tuig nagdangat ang infected sa 2,479.
Nagdangat naman sa 4,415 ang mga nagaedad sang 11-20 anyos.
Dugang pa sang natungdan, madamo ang posible kuhaan sang infection sang mga kabataan apisar nga wala ini nagagwa sa puluy-an.
Halimbawa sini amu ang mga ginikanan nga unvaccinated kag iban pa nga kaupod sa balay.
Pila naman sa mga myembro sang Philippine Pediatrics Society ang nag-volunteer para sa vaccination.
13 naman ka mga banwa sa Probinsya ang maga-upod sa launching sang 5-11 anyos nga vaccination rollout bwas nga adlaw.
Nabaton na sang Probinsya ang 20,00 doses sang reformulated Pfizer vaccine kag napanagtag-tag na sa tagsa ka vaccination sites kag local government unit (LGU).
Sa pihak nga bahin, posible nga magbalik na ang face-to-face classes amu nga importante nga pabakunahan ang mga kabataan para man sa ila nga proteksyon.
Sa interview sang Bombo Radyo kay Iloilo Governor Arthur Defensor Jr, iya ginpahayag nga hatagan sang tyempo ang pagpabakuna.
Suno sa Gobernador, itigana ang Valentines day sa pagpabakuna sang bilog nga pamilya.
