ILOILO CITY- Ginhikayan ni Senate Minority Leader Franklin Drilon ang tuman ka uyaya nga hulag sang gobyerno sa procurement sang COVID-19 vaccine.
Sa interview sang Bombo Radyo kay Senator Drilon, iya ginpahayag nga tubtob subong, wala sa gihapon sang bisan isa ka injection ang nag-abot sa Pilipinas.
Suno sa opposition senator, apisar nga ginhatagan na sang Food and Drug Administration (FDA) sang emergency approval ang Sinovac vaccine sang China, indi man ini mahimo ihatag sa mga sektor nga dapat unahon hatagan sang bakuna nga amo ang mga health workers kag senior citizens bangud sa low efficacy rate sang bakuna.
Matandaan nga ang CoronaVac sang China ang ikatatlo nga bakuna nga gin-aprubahan para sa emergency use sa pungsod apang wala pa sang bisan isa nga nadeliver rason sang delayed rollout sang bakuna.
Samtang, ginalauman naman nga mapasar na subong sa senado ang Senate Bill (SB) 2057 nga nagatuyo nga mag-establisar sang vaccine indemnity fund nga magapadasig sang procurement sang coronavirus vaccines.
Suno kay Drilon, nalakip man diri ang pagpain sang indemnification fund agud magsabat sa posible nga gasto kag claims sa tion nga may yara sang adverse effects sang bakuna.
Una na nga ginsertipikahan ni President Rodrigo Duterte ang hagna bilang urgent.
