ILOILO CITY- Ginpakigbahin sang labing una nga graduate sang Iloilo National High School nga nakabaton sang with highest honors bilang valedictorian ang iya sekreto sa pagtuon.
Sa interview sang Bombo Radyo kay Lorraine Joy Zarragoza Bales, iya ginpahayag nga indi mahapos ang iya nangin kabuhi bilang isa ka senior high school student bangud kaangay sang iban nga estudyante late man ang iya pagpauli sa ila balay lakip na ang oras sang pagkaon kag pagkatulog.
Suno kay Bales, time management, maayo nga study habits, kag pagset sang schedule ang iya ginhimo agud mangin isa ka madinalag-on nga estudyante sa diin nangin bungan sini ang nagkalain-lain nga awards lakip na ang pagkilala.
Nagakadapat suno kay Bales nga ang pagtuon sang isa ka bata ukon estudyante ang santo man sa oras kun sa diin mas makapanumdum sila sang maayo kag sa iya bahin duha ka oras antes magtulog kag duha ka oras sa pagbugtaw sa aga ang pinakamaayo niya nga tion sa pagtuon.
Dugang pa sang natungdan, dako man ang nabulig sa iya sang suporta sang iya iloy, himata, mga kaabyanan lakip na ang pagpangamuyo sa Ginoo agud malab-ot niya ang kadalag-an sa patag sang pagtuon.
