ILOILO CITY- Nakasentro sa pagpasanyog kag pagpabakod sang relasyon sang magkahagugma kag magpamilya ang selebrasyon sang Valentine’s day sa Pakistan.
Suno kay Bombo International Correspondent Reynel Tanalgo, Mill Hill Missionary sa Pakistan, iya ginpahayag nga nagapatigayon sila sang seminar sa mga mag-asawa kun paano nila mas mapanami pa ang ila pag-updanay kag pagtamdanay.
Ginpahayag ni Fr. Tanalgo nga apisar gin-ban ini nga selebrasyon kag ginapamalabagan sang Islamist orthodoxy ang pag-obserbar sang sini nga adlaw, madamo sa gihapon sang mga Pakistanis ang nagaupod sa selebrasyon ilabi na ang mga pamatan-on.
Suno kay Tanalgo, ang mga Pakistani couples nagahatagan sang balloons, chocolates, kag bulak kas masami nga nagapakuha sang letrato sa atubang sang wall nga human sa red kag pink flowers.
Agud makalikaw naman nga i-scrutinize sang mga nagapamatok sa selebrasyon, nagalikaw ang mga balloon sellers sang heart-shaped kag red balloons, sa baylo, nagabaligya sila sang star, bird, ukon animal shapes apang madamo gihapon sang nagabaligya sang heart-shaped items.
Ginahingalitan naman sang mga negosyante nga makapataas sang presyo sang sini nga mga items agud makagulu-ginansya man.
