ILOILO CITY – Kasubong nga counter checking ang ginahimu sang validation kag evaluation team sa ginpatigayon nga Oplan Hawan sa bug-os nga pungsod.
Ini ang kasunod sang pag-umpisa na sang validation kag evaluation sa report sang tagsa ka Local Government Unit.
Sa interview sang Bombo Radyo kay Department of Interior and Local Government 6 Director Ariel Iglesia, iya ginpahayag nga sa tagsa ka lugar, may yara sang naka-asisgn nga validation kag evaluation team nga amo ang maga-usisa kun bala matuod ang ginpasa nga report sang tagsa ka Local Government Unit kun pagpanghawan sa mga dalanon ang pagahambalan.
Suno kay Iglesia, malaba kun tani ang patigayunon nga validation kag evaluation sa Oplan Hawan apang may yara sila sang deadline nga dapat sundon rason nga kinahanglan nila ini nga tumanon.
Ginpahayag ni Iglesia nga kun makapasa na sang report ang validation kag evaluation team, magapaguwa na sang desisyon ang agensya kun bala igasuspende ang isa ka Local Chief Executive.
Bag-o ang suspension order, ginpahayag sang natungdan nga siya mismo ang magapatigayon sang inspection kaupod ang mga tiglawas sang Department of Interior and Local Government central office para sa assessment.
Mas makapaayo suno kay Iglesia nga maka-upod ang media sa inspection agud nga makita ang proseso sang pag validate kag pag evaluate sa Oplan Hawan.
Samtang, subong nga adlaw, nag-umpisa na sa pagpatigayon sang validation kag evaluation sa syudad sang Iloilo ang team halin sa Bacolod City sa pagpamuno ni Department of Interior and Local Government Officer Maredith Madayag.
May kaangtanan diri, wala naghatag sang impormayson si Madayag tuhoy sa ila ginapatigayon nga validation kag evaluation sa baylo, magapaguwa lang sila sang press release.
Santo sa impormasyon nga nakuha sang Bombo News Team, lakip sa mga distrito sa syudad sang Iloilo nga una nga ginpadulungan sang team amo ang La Paz, Lapuz, Jaro, Mandurriao kag City Proper.
Buwas nga adlaw, ginapahayag nga sa distrito sang Molo kag Arevalo magapatigayon sang inspection ang validation kag evaluation team.
