ILOILO CITY- Nagsugod na ang validation team nagikan sa Bacolod City sa pag validate kag pag- evaluate sa accomplishment sa clearing operation sa Syudad sang Iloilo.
Ang validation team ang ginabug-usan sang mga tiglawas sang Department of Interior and Local Government, Philippine National Police, Bureau of Fire Protection kag Accredited Civil Society Organization.
Sa interview sang Bombo Radyo kay Bacolod City Department of Interior and Local Government Officer Marideth Madayag, iya ginpahayag nga mangin basehan sang ila validation amo ang final report sang Iloilo City Government nga napetsahan Setyembre 27.
Magatinir naman ang nasambit nga team sa syudad sa sulod sang duha ka adlaw para sa validation.
Nahibaluan nga 70% ang passing rate nga igahatag sa tagsa ka Local Government Unit.
Para sa mga mapaslawan nga makakuha sang 70%, nakadepende sa validation kag evaluation team ang pagdesisyon kun bala hatagan sang preventive suspension ang Local Chief Executive.
