ILOILO CITY – Bangud nga wala pa sang available nga license plastic cards, nagpagwa sang abiso sa publiko ang Land Transportation Office may kaangtanan sa renewal sang mga driver’s license.
Sa interview sang Bombo Radyo kay Ms. Riza Otayde, spokesperson sang Land Transportation Office Region VI, iya ginpahayag nga ginpalawig pa tubtob sa Abril 2, 2024 ang validity sang driver’s/conductor’s license nga may expiration date nga halin Abril 03, 2023 tubtub Abril 01, 2024.
Suno kay Otayde, wala sang multa nga ipapanaog sa nasambit nga mga lisensya.
Pananglitan mag-renew, tatakan sang “Valid as Temporary Driver’s License Until Plastic Card is Released” ang system-generated driver’s license Official Receipt kaupod ang mga masunod nga impormasyon:
a. Pangalan sang Issuing Office, Contact Personnel/Cellphone No./email address;
b. Pangalan kag pirma sang releasing officer; kag
c. Screenshot sang driver’s license card (atubang kag likod) sang kliyente nga nakaprint sa likod sang Official Receipt
Ang daan ukon nag-expire nga driver’s license card ang ibalik sa tag-iya kag batunon nga valid tubtub mabaton na sini ang bag-o nga plastic card.
Nahibaluan nga ginkumpirma sang ahensya nga may ongoing “shortage” sang plastic license cards nga amo ang ugat sang desisyon nga mag-issue na lamang sang temporary licenses nga na-imprinta sa isa ka papel.
Una na nga ginpahayag ni anay Land Transportation Office chief Jay Art Tugade nga ini ang resulta sang department order nga ila nabaton sang Enero nga nagasa-ad nga ang tanan nga procurement nga nagabalor P50 million kag pasaka ang dapat nga patigayunon sang Derpartment of Transportation central office.
