Nagpasalig ang tagdumalahan sang Vallacar Transit Inc. (VTI) nga indi maapektuhan sang pagkambyo sa liderato sang pinakadako nga bus transport company ang ila operasyon.
Ini matapos gin-ilisan si Leo Rey Yanson sang iya magulang nga si Roy Yanson bilang Presidente sang VTI pinaagi sa isa ka special board meeting.
Sa interview sang Bombo Radyo Iloilo kay Mr. Moises Flores, Admin Manager sang VTI, iya ginpahayag nga status quo sa gihapon ang biyahe sang ila mga units.
Suno kay Flores, wala mansang pagbag-o sa mga polisa kag sistema sang kompaniya.
Ginpahayag naman ni Flores nga sa subong, si Leo Rey Yanson sa gihapon ang ila ginakilala nga presidente kag CEO sang VTI.
Gindayaw pa ni Flores si Leo Rey nga amo ang rason kun ngaa labi nga nagdako ang VTI, sa diin gikan sa masobra isa ka libo ka units,naglab-ot na ini subong sa 4800 ka units sang bus sa bilog nga pungsod.
Nahibaluan nga isa sa mga ginatudlo nga rason kun ngaa gin-islan si Leo Rey bilang Presidente amo ang kapaslawan nga magreport sa iya opisina sang masobra isa ka tuig bangud sa pagtutok niya sa Ceres Negros Football Club sa diin gin-akusaran siya nga ang ginasweldo niya sa mga football players ang ginakuha mismo sa kita sang ila kumpanya.
