Gin-anunsyo ni Pope Francis nga umpisa sa masunod nga semana, iga-translate naman sa Mandarin ang iya nga ginapanghambal kun mag-atubang siya sa mga tumuluo sa Vatican.
Sa kada Miyerkules, nakaandan nga nagahambal si Pope Francis sang Italian kag ini nga teachings ang gina-translate kag ginabasa sa English, French, German, Polish, Spanish, Portuguese kag Arabic para mas madamo ang makahangop sa bisan diin nga parte sang kalibutan.
Ang Mandarin nga amo ang official language sang China amo ang pinakaulihi nga idugang.
Kun balikan ang maragtas, wala sang suod nga relasyon ang Vatican kag ang communist China apang ginatinguhaan sang Santo Papa nga himuon nga normal ang ila pagtamdanay.
Sang Oktubre, ginpalawig sang Vatican kag China ang kasugtanan sa pag-appoint sang Catholic bishops sa North Asian country sa apat ka tuig.
Una nga nabalay sang 2018 ang kasugtanan nga amo ang nagresolba sa dinekada na nga dibisyon sa underground church nga loyal sa Santo Papa kag sa China-supervised Catholic Patriotic Association nga naga-operate sang separado sa Holy See.
Ginabanta nga may 10 tubtub 12 milyon nga mga Katoliko nga yara sa China.
